~:: Kuch yaadien hain un lamhon ki ::~

Kuch yaadien hein un lamhon ki
Jin lamhon mein hum sath rahey
Khushion se bharey jazbat rahey
Ik umar guzari hai hum ne
Jahan rotey huey bhi hanstey thay
Kuch kehtey thay kuch suntey thay
Hum roz subha jab miltey thay
To sab k chehrey khiltey thay
Pur lutf wo manzar hota tha
Sab mil kar baatein kartey thay
Hum socho kitna hanstey thay
Wo goonj hamarey hansney ki
Ab aik purani yaad bani
Yeh baatein hein un lamhon ki
Jin lamhon mein hum saath rahey


Dedicated to my VU-IT FAMILY, Miss You ALL

~:: Is dafa main khoob roya baarishon ke sath sath ::~

Kuch khushi ke saye mein aur kuch ghamon ke sath sath
Zindagi ye katt rahi hai uljhanon ke sath sath

Aaj tak us ki thakan se dukh raha hai ye badan
Ek safar main ne kia tha khuwahishon ke sath sath

Kis tarah khaya hai dhoka, ye bhala kese kahoon
Doston ke mashwaray thay sazishon ke sath sath

Sheher mein kuch log mere chahney walay bhi thay
Phool bhi lag rahay thay patharon ke sath sath

Is dafa saawan mein us ki yaad ke baadal rahay
Is dafa main khoob roya baarishon ke sath sath

~:: Koi sunay ga to kya kahay ga ::~

Kisi ki khatir qarar khona, koi sunay ga to kya kahay ga?
Tumhara raaton ko uth ke rona, koi sunay ga to kya kahay ga?

Zamana ahd-e-shabab ka hai, naye khuwab-o-khayal ka hai
Ye shab'bedari aur din ka sona, koi sunay ga to kya kahay ga?

Bhanwar mein tum mujhey chor aatay, yunhi mohabbat ka raaz rehta
Laa ke sahil pe youn dubona, koi sunay ga to kya kahay ga?

Kaha ye main ne daro Khuda se, hamaray dil ko dukha rahay ho
Wo hans ke bolay, chup raho na, koi sunay ga to kya kahay ga?

~:: Salook-e-na'rawa ka is liye ::~

Salook-e-na'rawa ka is liye shikwa nahi karta
Ke main bhi to kisi ki baat ki parwa nahi karta

Bohat chalaak hun, apni larai aap larta hun
Main dil ki baat kabhi deewar par likha nahi karta

Agar parr jaye aadat aap apney sath rehney ki
Ye sath aisa hai ke insan ko kabhi tanha nahi karta

Zameen pairon se kitni baar he din mein nikalti hai
Main aisey haadison pe dil magar chota nahi karta

Tera israar sar ankhon pe, Tujh ko bhool janey ka
Main koshish kar ke dekhoon ga, magar wada nahi karta

~:: Teri YAAD ::~

Na fikr-e-farda, na yaad-e-maazi
Na chain dil ko, na be-qaraari

Na hadd se guzra hua junoon
Na khaam'shi wo pehley jesi

Bus ik udaasi hai dheemi dheemi
Jo zindgi ke adhoorey pann ko
Hadon se aagey barha rahi hai

Shayed
Teri yaad aa rahi hai

Haan!
"Teri YAAD aa rahi hai"

~:: Nahi jo dil me jagah to nazar me rehne do ::~

Nahi jo dil me jagah to nazar mein rehney do
Meri hayaat ko apney asar mein rehney do

Koi to khuwaab meri raat ka muqaddar ho
Koi to aks meri chashm-e-tarr mein rehney do

Main apni soch ko teri gali me chor aaya
Tum apni yaad ko mere hunar mein rehney do

Ye manzilein to kisi aur ka muqaddar hain
Mujhey bus apney junoon ke safar mein rehney do

Haqiqatein to bohat talkh ho gai hain Wasi
Merey wujood ko khuwaabon ke ghar mein rehney do

~:: Bohot muddat se aisa hai ::~

Bohot muddat se aisa hai
Ke tum khaamosh rehtey ho

Koi gehra hai gham shayed
Jisey chup chaap sehtey ho

Yunhi chaltey huey tanha
Koi ghamgeen sa naghma
Tum aksar gun'gunatey ho

Doran-e-guftugu yunhi
Milein nazron se jab nazrein
To baatein bhool jatey ho

Kisi gumm summ si haalat mein
Ya phir barish ke mosam mein

Faqat itna he kehtey ho
Udasi be'waja si hai
Bohat bojhal tabiyat hai

Bhala such kyun nahi kehtey
Kisi ko yaad kartey ho

~:: Aey ishq humari galiyon mein ::~

Yun dil na lagey na dard uthey, matt roz milo to acha hai
Na pyaar barhey, na jhagra ho, tum dur baso to acha hai

Is pyaar ki sundar baahon mein, ab baahain daal ke so bhi chuko
Yun jee jee ke ab marney se, marr marr ke geo to acha hai

Le ke zanjeerein haathon mein, kuch log tumhari taaq mein hein
Aey ishq humari galiyon mein, na aur phiro to acha hai

~:: Hum aaj bhari baz'm mein jhootey huey Mohsin ::~

Hum aaj bhi hein soch mein doobey huey Mohsin
Khud se, kabhi dunya se hein roothey huey Mohsin

Deney ke liye us ko jo hum ne thay sambhaalay
Wo phool kitaabon mein hein sookhey huey Mohsin

Wo apni jafaa'on mein kuch kami to karein aaj
Ik umer hui sheher wo, chorey huey Mohsin

Hum ne ye kaha tha ke unhein pyar hai hum se
Hum aaj bhari baz'm mein jhootey huey Mohsin

Aagosh mein un ki humein raahat jo mili hai
Hum aaj kuch andar se hein tootey huey Mohsin

~:: Ahl-e-Mohabbat ::~

Har din Mohabbat ka, har raat Mohabbat ki
Hum Ahl-e-Mohabbat mein, har baat Mohabbat ki

Dolat ke ameeron ne, dekhi he nahi shayed
Daaman mein ghareebon ke, bohtaat Mohabbat ki

Seeney pe liye phirtey hein, ilzaam Mohabbat ka
Ankhon se barasti hai, barsaat Mohabbat ki

Un ke daaman main hain, sarey jahaan ki dolat
Jo bant'tey phirtey hein, khairaat Mohabbat ki

Hum dard ke maaron ka, itna sa hawala hai
Tanhayi hai ghar apna or zaat Mohabbat ki

~:: Bichra to rastey mere dushwaar kar gya ::~

Be-Ait'bar shakhs tha, so waar kar gya
Lekin merey shaoor ko bedaar kar gya

Kuch main ne ishti'aal mein shikwey giley kiye
Kuch wo shikayatein sar-e-baazar kar gya

Pehley wo meri zaat ki taameer mein raha
Phir mujh ko apney haath se masmaar kar gya

Wo aa mila to faasley kat'tey chaley gaye
Bichra to rastey mere dushwaar kar gya

~:: Ye Haqeeqat ::~

Lagzishon Se Maavra Tu Bhi Nahi Main Bhi Nahi
Dono Insan Hein Khuda Tu Bhi Nahi Main Bhi Nahi

Tu Mujhey Aur Main Tujhey Ilzaam Deta Hoon Magar
Apney Andar Jhaankta Tu Bhi Nahi Main Bhi Nahi

Maslehat Ne Kar Dia Dono Main Paida Ikhtilaaf
Warna Fitrat Ka Bura Tu Bhi Nahi Main Bhi Nahi

Mukhtalif Simton Mein Dono Ka Safar Jaari Raha
Ek Lamhey Ko Ruka Tu Bhi Nahi Main Bhi Nahi

Chahtey Dono Bohat Ik Doosrey Ko Hein Magar
Ye Haqeeqat Manta Tu Bhi Nahi Main Bhi Nahi

~:: udaas tha ::~

Mujh se bichar ke, mujh ko rula kar udaas tha
Meri tarah wo khud ko jala kar udaas tha

Aisey ajeeb dard ke pehrey they chaar su
Ab ke wo merey shehr mein aa kar udaas tha

Mujh ko bhi us ki yaad staati rahi bohat
Wo bhi diyaar-e-ghair mein ja kar udaas tha

Merey ilawa bhi hai koi us ke shehr mein
Itni si baat mujh ko bata kar udaas tha

Usko udaas kar gai beetey dinon ki yaad
Guzri rafaqaton ko ganwa kar udaas tha

~:: Ab Teri Yaad Se Wehshat Nahi Hoti Mujh Ko ::~

Ab Teri Yaad Se Wehshat Nahi Hoti Mujh Ko
Zakhm Khulty Hein, Aziyyat Nahi Hoti Mujh Ko

Ab Koi Aaye, Chala Jaye, Main Khush Rehta Hoon
Ab Kisi Shakhs Ki Aadat Nahi Hoti Mujh Ko

Aaisa Badla Hoon Terey Sheher Ka Paani Pee Ker
Jhoot Boloon To Nidamat Nahi Hoti Mujh Ko

Itna Masroof Hoon Jeeney Ki Hawas Mein Faraz
Saans Leney Ki Bhi Fursat Nahi Hoti Mujh Ko

~:: bohot roya ::~

Ik harf tasalli ka, Ik lafz muhabbat ka
Khud apney liye main ne, likha to bohot roya

Pehley bhi shikaston pe, khai thi shikast ham ne
Lekin main terey haathon, haara to bohot roya

Itna asaan bhi na tha, hasti se guzar jana
Utra jo samandar main, to darya bhi bohot roya

Jo shakhs nahi roya, kabhi tapti hui raahon mein
Deewaar ke saye mein, BETHA TO BOHOT ROYA

~:: Be'lous muhabbat karney walay ::~

Be'lous muhabbat karney walay
Log alag he hotey hein

Aur in logon ko milney walay
Rog alag he hotey hein

Kabhi tanha baatein kartey hein
Kabhi mehfil mein bhi tanha hein

Kabhi baat baat pe hanstey hein
Kabhi chupkey chupkey rotey hein
Khushiyan bhi alag he hoti hein
Aur sog alag he hotey hein

Belos muhabbat karney walay
Log alag he hotey hein

~:: Fareb-e-zaat se niklo ::~

Fareb-e-zaat se niklo, jahaan ke saanihey dekho
Haqiqat mun'kashf hogi, kabhi to aainey dekho

Wohi ik ajnabi jis se, taa'luq sar'sari sa tha
Hamarey dil mein hotey hein, usi ke tazkirey dekho

Likha hai waqt ne ye bhi, ajeeb apney muqaddar mein
Palatna he nahi jis ko, usi ke rastey dekho

Hamein samhjho na khush itna, labon ki muskuraahat se
Hamari ankh mein pehley, hazaron haad'sey dekho

Thakey haarey se bethey thay, magar teri sada sunn kar
Shikasta paa chaley aaye, hamarey hosley dekho

~:: Udaas ::~

Meri neend mujh se bichar gai, mere khuwab mujh se juda huey Ye bara he gham ka muqaam hai, zara lout aa main udaas hoon Koi phoot phoot ke ro raha hai abhi talak meri zaat mein Mere dil mein ik kohraam hai, zara lout aa main udaas hoon Tere dum se zinda hoon aaj bhi, tu he zindagi ki umeed hai Tere baad jeena haraam hai, zara lout aa main udaas hoon Meri zindagi, meri bandagi, meri khuwahishein, meri chahatein Meri har khushi tere naam hai, zara lout aa main udaas hoon